Қирғизистон парламенти депутатлари оммавий ахборот воситалари учун ёпиқ бўлган мажлисда ўзларининг ойлик маошларини оширишга қарор қилишди. Бу ҳақда Kloop нашри маълум қилган.
Хабарда қайд этилишича, ушбу масала 7 сентябрда бўлиб ўтган ва ёпиқлиги сабаби ОАВ вакиллари учун қизиқиш касб этмайдиган "ички масалалар", дея тушунтирилган мажлисда муҳокама қилинган. Бироқ, кейинроқ у ерда, жумладан, парламент аъзолари маошларини ошириш ҳақида ҳам гап боргани маълум бўлган.
"Ата-Журт" партияси вакили Алишер Козуев журналистлар томонидан берилган ўзининг ҳозирги иш ҳақи тўғрисидаги саволга жавобан ойлиги 35 минг сом (тахминан 4 миллион 686 минг 500 сўм)дан 60 минг сом (8 миллион 34 минг сўм)гача кўтарилганини айтган. Бошқа депутатлар эса саволларга тўғридан-тўғри жавоб беришдан қочишган.
