Шуни ҳисобга олган ҳолда, мамлакатимизда мактабгача таълим тизимини ривожлантириш ва самарали фаолият кўрсатишига қаратилган қатор норматив-ҳуқуқий ҳужжатлар қабул қилинди. Улар асосида янги, барча шарт-шароитларга эга мактабгача таълим муассасаларини қуриш, реконструкция қилиш, уларнинг иш тизимини янада такомиллаштириш, бир сўз билан айтганда, бу муассасаларда ўғил-қизларимизнинг пухта бошланғич билим ва тарбия олиши учун қулайлик яратиш, малакали педагог кадрлар, ўқув-услубий воситалар билан таъминлаш борасида кенг қамровли ишлар амалга оширилмоқда.
Яккабоғ туманида фойдаланишга топширилган 8-сонли мактабгача таълим муассасаси ҳам фарзандларимиз камоли йўлида амалга оширилаётган ана шу ишларнинг узвий давоми бўлди. Ушбу муассаса бунга қадар мослаштирилган бинода, қийин шароитда фаолият юритиб келаётган эди.
- Муассасамизнинг янги биносида болаларимизга жаҳон андазалари асосида таълим ва тарбия бериш учун барча шарт-шароитлар яратиб берилди, - дейди муассаса мудираси Шоира Алиқулова. – Хоналар ёруғ ва шинам, барча инвентарлар мавжуд. Ҳозирда 4 гуруҳда 84 нафар болажон тарбия олмоқда. Рус тили, инглиз тили, бадиий гимнастика ва миллий кураш тўгараклари доимий фаолият олиб бормоқда. Келгусида яна янги тўгараклар ташкил этиш ниятимиз бор.
Муассаса 816 миллион сўмлик инвестиция маблағи асосида “Яккабоғ сайёд” масъулияти чекланган жамияти қурувчилари томонидан бунёд этилди.
Собир НАРЗИЕВ
Муаллиф олган суратлар.
